Ahmetaj: Ballkani, rajon tërheqës për investime

Në vijim të Forumit Ekonomik të Vjenës që po mbahet në Tiranë, ministri i Zhvillimit Ekonomik, Arben Ahmetaj ka deklaruar se rajoni i Ballkanit po kthehet gradualisht në një atraksion për investitorët e huaj.

“Shqipëria, Serbia, Mali i Zi, Kosova dhe BeH janë tregje të vogla të veçuara dhe jo aq interesante, por si rajon në tërësi ka një numër të konsiderueshëm konsumatorësh. Marrëveshja e CEFTA-s e ka bërë këtë rajon “duty free”. Prandaj, ky Ballkani është interesant”, ka thënë Ahmetaj.

Edhe pse i vetëdijshëm për problemet e trashëguara nga e kaluara problematike, Ahmetaj është shprehur i sigurt se tashmë rajoni i Evropës jug-lindore po hyn në një fazë të re.

“Në fund të fundit, neve jemi në Evropë, ky është vend evropian, që do të thotë se rajoni është shkëputur nga problemet e sigurisë dhe po kthehet në një atraksion për vendet e tjera”, ka thënë Ahmetaj.

Ai ka shtuar se në këtë drejtim mbështetja e Brukselit është jetike, ndërsa vetë vendet e rajonit duhet t’i konkretizojnë edhe më tej projektet e përbashkëta, edhe duke përafruar politikat fiskale.

Të pranishëm në këtë takim janë edhe zyrtarë të huaj, mes të cilëve ish-kryeministri dhe ministri i Jashtëm i Italisë, Massimo D’Alema.