Arben Ahmetaj shpallet në kërkim ndërkombëtar
Policia e Shtetit ka bërë të ditur SPAK se nuk ka asnjë mundësi të gjejë dhe arrestojë ish-zv. kryeministrin Arben Ahmetaj brenda vendit. Ai është akuzuar për korrupsion pasiv, pastrim parash, dhe fshehje pasurie. Sipas verifikimeve të kryera nga policia, ai ndodhet jashtë vendit, duke u referuar sistemit TIMS.
Pasi konfirmimi u mor në rrugë zyrtare, Prokuroria e Posaçme iu drejtua Interpolit për të kërkuar ndërkombëtarisht ish-zv. Kryeministrin. Nëse emri i Ahmetaj shfaqet në kartelën e kuqe të Interpolit, autoritetet e çdo vendi mund ta arrestojnë atë për llogari të drejtësisë shqiptare.
Gjykata ka caktuar masën e sigurisë arrest me burg për Arben Ahmetaj, pasi Kuvendi i dha SPAK autorizimin për arrestimin, kontrollin personal dhe kontrollin e banesës së tij. Banesat e Ahmetaj dhe të familjarëve të tij janë kontrolluar dhe janë sekuestruar celularë dhe pajisje elektronike që mund të shërbejnë për hetimin.
Ndërsa hetimi për Ahmetaj vazhdon, gjykata ka caktuar seancën gjyqësore për 15 të pandehurit e akuzuar për aferën e inceneratorit të Fierit për muajin shtator. Avokatët e ish ministrit të Mjedisit Lefter Koka kanë kërkuar më parë të gjitha fashikujt e plotë të dosjes për të përgatitur mbrojtjen e tyre. Ndërsa avokati i Klodian Zotos, biznesmenit të inceneratorëve në kërkim, do të paraqesë argumentet e mbrojtjes pas dëgjimit të avokatëve të ish ministrit. Procesi është shtyrë për në shtator për shkak të pushimit zyrtar të gushtit për gjyqtarët dhe prokurorët.
