Athina kundërshton vendimin e BQE-së për mosblerjen e bondeve greke
Arritëm një marrëveshje që nuk pasqyrohet plotësisht në vendimet e Bankës Qendrore Evropiane (BQE), deklaroi zëvendëskryeministri grek, Janis Dragashaqis në edicionin qendror të lajmeve të televizionit privat grek, ANT1, lidhur me vendimin e BQE-së për mosblerjen e bondeve greke.
Dragashaqis vuri në dukje se mesazhi që dërgonte BQE-ja ishte se kërkonte ekzistencën e një marrëveshjeje që u arrit më 20 shkurt.
”Mirëpo duket se në vendimin e bankës nuk u inkorporua marrëveshja e Eurogrupit”, komentoi nënkryetari i qeverisë.
Daragashaqis tha se, sigurisht, ka edhe mesazhe pozitive në deklaratat e presidentit të BQE-së, Mario Draghi, si për shembul fakti që theksoi se bankat greke nuk kanë probleme.
“Ne e respektojmë marrëveshjen, presim që ta respektojnë edhe partnerët tanë. Gjendemi në stadin e specifikimit të marrëveshjes”, shtoi ai.
Presidenti i Bankës Qendrore Evropiane (BQE), Mario Draghi përjashtoi mundësinë që në fazën aktuale, banka të pranojë rishtas si kolateral për marrje likuiditetesh bondet shtetërore greke.
Gjatë një konferencën shtypi në kryeqytetin qipriot, Draghi iu referua Konventës së BE-së dhe konkretisht nenit 123 për financimin monetar.
“BQE-ja e ka kredituar Greqinë me 100 miliardë euro deri sot, shumë që arriti nga 50 në 100 miliardë dy muajt e fundit dhe që i korrespondon 68 për qind të Prodhimit të Brendshëm Bruto (PBB) të vendit, më e larta në gjithë eurozonën”, deklaroi Draghi.
”Në këtë sens, mundet dikush të thotë që BQE-ja është banka qendrore e Greqisë, në ndërkohë që ajo është banka qendrore e gjithë vendeve të tjera”, nënvizoi Draghi.
Sa i përket blerjes së bondeve greke, ai tha se BQE-ja është e para që uron të mundet të financojë ekonominë greke, nëse përmbushen kushtet, domethënë të ketë një konkludim të suksesshëm të inspektimit të vendit.
