Avokatët e Doshit, kërkesë në Kushtetuese: Të rikthehet në Parlament

Avokatët mbrojtës të deputetit Tom Doshi dorëzuan këtë të premte në Gjykatën Kushtetuese kërkesën për vlerësimin e ligjshmërisë të ndalimit të deputetit dhe lejimin e tij për t’u rikthyer në Parlament.

“Kërkojmë të shfuqizohet si antikushtetues, qoftë vendimi i Kuvendit, qoftë edhe i Kolegjit Penal. Janë shkelur dispozitat kushtetuese dhe dispozitat e akteve ndërkombëtare që garantojnë lirinë e personit”, tha për mediat avokati Vladimir Meçi.

Meçi dhe avokati tjetër mbrojtës i Doshit, Ferid Muçaj, pretendojnë se vendimi i Parlamentit ndaj deputetit është i paligjshëm, e për rrjedhojë, Doshi duhet t’u rikthehet funksioneve të tij parlamentare si person i zgjedhur dhe jo i emëruar.

Deputeti Tom Doshi ndodhet në arrest shtëpie dhe po hetohet për kanosje, deklaratë dhe kallëzim të rremë.