Basha-Dendias: Çështjet e mbetura pezull të zgjidhen me frymën e mirëkuptimit; domosdoshmëri anulimi i ligjit të luftës
Kryetari i Partisë Demokratike, Lulzim Basha zhvilloi sot një takim me ministrin e Jashtëm të Greqisë, Nikos Dendias.
“Gjatë bisedës nënvizuam domosdoshmërinë që në frymën e mirëkuptimit dhe respektit reciprok, të zgjidhim çështjet e mbetura pezull dhe të intensifikojmë bashkëpunimin dypalësh në të gjitha fushat, përfshirë edhe lehtësitë për shqiptarët që jetojnë e punojnë në Greqi”, tha Basha.
Ai riktheksoi qëndrimin e shprehur prej 10 vitesh, se zgjidhja për çështjen e detit duhet të vijë përmes Gjykatës Ndërkombëtare.
“I përsërita ministrit Dendias domosdoshmërinë për abrogimin e ligjit të luftës. Në emër të Partisë Demokratike dhe opozitës shqiptare e falënderova atë për mbështetjen e çmuar që Greqia po i jep vendit tonë në procesin historik të integrimit europian”, tha ai.
