Basha takon Fyle: Reforma në drejtësi, vetëm nëse ka transparencë dhe gjithëperfshirje

Kryetari i Partisë Demokratike, Lulzim Basha zhvilloi mëngjesin e sotëm një takim  me komisionerin për zgjerimin, Stefan Fyle. Në një prononcim për mediat pas këtij takimi Basha u shpreh se e vuri në dijeni komisionerin për situatën politike në të cilën ndodhet vendi dhe dhunën që sipas tij përfaqësuesit e mazhorancës kanë ushtruar ndaj opozitës çka është bërë edhe shkak i bojkotit të parlamentit nga ana e opozitës.

Sipas Bashës, opozita është shprehur e gatshme të kthehet në kuvend me kusht që këtij institucioni t’i kthehet ligjshmëria.

“Ne duam të kthehemi në Kuvend, por ai nuk është ndërtesë nuk është grumbull qytetarësh, por Kushtetutë, debat, ligj, rregullore të gjitha këto janë nëpërkëmbur. Kërkojmë rivendosjen e parlamentit”, shtoi ai.

Basha u shpreh se me komisionerin kishin diskutuar edhe lidhur me reformën në drejtësi pjesë e të cilës opozita sipas tij do të bëhet vetëm kur të garantohet gjithëpërfshirja dhe transparenca.