Komisioni Evropian refuzon pezullimin e Paktit të Stabilitetit: Nuk ka recesion të rëndë

Bashkimi Evropian nuk ka ndërmend të pezullojë Paktin e Stabilitetit dhe Rritjes në rrethanat aktuale, pavarësisht tensioneve dhe pasigurive gjeopolitike në rritje. Këtë qëndrim e ka bërë të qartë sot një zëdhënës i Komisionit Evropian, duke hedhur poshtë spekulimet për një devijim të mundshëm të shteteve anëtare nga rregullat strikte të disiplinës fiskale.

I pyetur drejtpërdrejt nga agjencia italiane e lajmeve ANSA mbi mundësinë e një ngrirjeje të përkohshme të Paktit të Stabilitetit, zëdhënësi sqaroi se rregullorja evropiane është e qartë. “Klauzola e përgjithshme e shmangies, e cila i lejon shteteve anëtare të devijojnë nga rruga e tyre e përcaktuar e shpenzimeve neto, mund të aktivizohet vetëm në rast të një rënieje të rëndë ekonomike që prek zonën e euros ose Bashkimin Evropian në tërësi,” theksoi zyrtari i Komisionit.

Kjo klauzolë u përdor për herë të fundit gjatë krizës së shkaktuar nga pandemia COVID-19, për t’u dhënë frymëmarrje ekonomive të bllokuara evropiane, por sipas Brukselit, situata aktuale nuk përmbush kriteret për një masë të tillë ekstreme.

Ndikimi i tensioneve në Lindjen e Mesme

Megjithëse situata makroekonomike evropiane vlerësohet si jo në recesion të rëndë, Brukseli pranon se tensionet gjeopolitike mbeten një faktor rreziku i lartë.

Zëdhënësi shtoi se ekzekutivi evropian po ndjek me vëmendje maksimale zhvillimet e fundit ndërkombëtare, veçanërisht krizën në Lindjen e Mesme, e cila ka potencialin të godasë tregjet globale dhe zinxhirët e furnizimit me energji.

“Ne po e monitorojmë nga afër situatën e paqëndrueshme në Lindjen e Mesme, por, për momentin, nuk jemi në këtë skenar të recesionit të rëndë,” përfundoi ai.

Deklarata rikonfirmon vendosmërinë e Komisionit Evropian për të rikthyer rregullat fiskale dhe për të kërkuar nga shtetet anëtare mbajtjen e deficiteve dhe borxhit publik nën kontroll, pas viteve të shpenzimeve emergjente.

/rtsh.al/

The post Komisioni Evropian refuzon pezullimin e Paktit të Stabilitetit: Nuk ka recesion të rëndë appeared first on RTSH.