Basha vëzhgon punimet te “Nënë Tereza”: Bashkia e Ramës bënte llogje, ne punojmë

Gjatë një vizite në sheshin “Nënë Tereza”, për të vëzhguar nga afër punimet për ristrukturimin e kësaj zone, ku do të mbahet dhe mesha e parashikuar nga Papa më 21 shtator, kreu i Bashkisë Tiranë, Lulzim Basha, ka deklaruar se bashkia është në krye të detyrës dhe po vijon punën në pritje të Atit të Shenjtë.

Basha i konsideroi akuzat e mazhorancës për braktisjen e detyrës së kreut të bashkisë nga ana e tij, si vetëm “llogje” dhe “fjalë boshe”.

“Më vjen mirë që Bashkia e Tiranës, krahas vizionit që ka për Tiranën, i ka kthyer vëmendjen edhe qendrave të vjetra të qytetit. Veprat flasin vetë. Bashkia e Tiranës dhe kryetari i Bashkisë, preferon të flasë me vepra, jo me llogje”- theksoi Basha.

Basha sqaroi se projekti i miratuar për sheshin, është lënë në harresë për 15 vjet dhe ai do t’u rikthehet qytetarëve sa më shpejt.

“Ky shesh ishte lënë në harresë nga ata që duhej ta bënin këtë punë. Ky shesh do të kthehet në një zonë pedonale, muzeore dhe do të shërbejë për rritjen e cilësisë së qytetarëve të Tiranës, që nga fëmijët deri tek të moshuarit, – siguroi Basha. – Ata që deri dje bënin llogje, vazhdojnë edhe sot bëjnë llogje. Bashkia e mëparshme bënte llogje, ndërsa ne punojmë”.