Basha: Vijon bojkoti i Kuvendit. Ligjet e kthyera nga Nishani do t’i çojmë në Kushtetuese

Kreu i Partisë Demokratike, Lulzim Basha deklaroi sot se PD do të vijojë bojkotin ndaj Kuvendit në sesionin e ri, por se do të vijojë të jetë opozitë e fuqishme jashtë tij.

Duke folur gjatë mbledhjes se grupit parlamentar të PD, kryedemokrati akuzoi dyshen Rama-Meta se me mënyrën se si po qeverisin po krijojnë një oligarki të vërtetë duke goditur bashkëjetesën demokratike me opozitën

“Rama dhe Meta nuk kanë ardhur për të qeverisur përmes ligjit, por për të sunduar sipas partisë së vjetër shtet. Kjo politikë revanshiste, me gjithë humbjet që ka pësuar ndaj institucioneve të pavarura, ia ka dalë të krijojë një oligarki tipike. Së dyti, ka goditur për vdekje bashkëjetesën demokratike me opozitën”, – deklaroi kreu i opozitës.

Basha gjithashtu paralajmëroi se Partia Demokratike do të çojë në Gjykatën Kushtetuese të gjitha dekretet e kthyera nga presidenti i republikës Bujar Nishani, të cilat sipas tij u hodhën poshtë me një të rënë të lapsit pa marrë parasysh asnjë prej argumenteve të dhëna nga kreu i shtetit.