Bllokohet gomonia që do të trafikonte lëndë narkotike, shoqërohen dy persona

Shërbimet e policisë së Vlorës bllokuan paraditen e të premtes një gomone, e cila dyshohet se do të përdorej për të trafikuar lëndë narkotike, ndërkohë që shoqëroi dy persona që u kapën në bordin e saj.

Burime zyrtare të policisë lokale bënë të ditur për ATSH-në se, mjeti lundrues u kap në hapësirën detare, 500 metra në veri të ishullit të Sazanit, gjatë një operacioni të përbashkët të strukturave të Drejtorisë së Policisë së Kufirit, Repartit Delta Force dhe të Drejtorisë së Policisë së Qarkut. “Aksioni, që nisi pas informacioneve të siguruara në rrugë operative, u konkretizua me bllokimin e një gomoneje me gjatësi 7 metra dhe e pajisur me 2 motorrë 150 hp secili”, thanë burimet zyrtare të policisë. Sipas tyre, në bordin e gomones ndodheshin dy persona, të cilët u shoqëruan në komisariat.

Paraprakisht mendohet se mjeti lundrues do të përdorej për trafikimin e një sasie të konsiderueshme lënde narkotike, me destinacion vendet fqinje.