Bushati në Kazakistan: Nxisim bashkëpunimin ekonomiko-tregtar mes dy vendeve

Intensifikimi i marrëdhënieve ekonomiko-tregtare ishte në qendër të vizitës zyrtare që Ministri për Europën dhe Punët e Jashtme, Ditmir Bushati zhvilloi sot në Astana, Kazakistan.

Gjatë kësaj vizite, e para e një ministri të jashtëm të Shqipërisë gjatë këtyre 25 viteve, Bushati u takua me Ministrin e Jashtëm të Republikës së Kazakistanit, Kairat Abdrakhmanov si dhe u prit në takim nga Kryetari i Senatit Kassym-Jomart Tokayev.

Në takimin me homologun kazak, Ministri Bushati e vuri theksin në rëndësinë e intensifikimit të marrëdhënieve ekonomiko-tregtare, përmes konkretizimit të lidhjeve në sektorë të ndryshëm të biznesit, në fushat me interes të përbashkët mes dy vendeve.

Ai e quajti premtues bashkëpunimin dypalësh për realizimin e projekteve në fushën e naftës dhe të gazit, infrastrukturës, turizmit, agro-bujqësisë dhe nënvizoi gjithashtu nevojën e nxitjes së kontakteve mes komuniteteve të biznesit të të dy vendeve, në mënyrë që të përfitohet sa më shumë nga të gjitha hapësirat e mundshme të bashkëpunimit.

Gjatë takimit, Ministri Bushati falënderoi homologun për thellimin e bashkëpunimit shumëpalësh duke rikonfirmuar angazhimin e mëtejshëm në çështjet e sigurisë, luftën kundër terrorizmit, krimit të organizuar dhe sfidave e kërcënimeve të tjera transnacionale.

Në këtë kuadër, Ministri Bushati dhe homologu Abdrakhmanov diskutuan mbi bashkëpunimin në organizatat ndërkombëtare dhe forcimin e bashkëpunimit në planin shumëpalësh, përfshirë këtu dhe mbështetjen për kandidaturën e Shqipërisë për marrjen e Kryesisë së OSBE-së në 2020.

Ministri Bushati u ndal tek diaspora shqiptare e pranishme në kryeqytetin kazak Astana, për të cilët u shpreh se janë urë lidhëse dhe faktor për zhvillimin e biznesit dhe marrëdhënieve tregtare mes dy vendeve. Nga ana e tij, Ministri Abdrakhmanov shprehu interesin e Kazakistanit për nxitjen e mëtejshme të marrëdhënieve të bashkëpunimit me Shqipërinë, sidomos në aspektin ekonomik dhe bashkarisht me Ministrin Bushati u dakordësuan për të finalizuar kuadrin ligjor, i cili do të lehtësojë bashkëpunimin në këtë drejtim. Gjatë kësaj vizite, Ministri Bushati shoqërohej edhe nga një grup biznesmenësh shqiptarë.

Në fund të takimit nënshkruan edhe dy marrëveshje, Protokolli i Bashkëpunimit ndërmjet dy Ministrive të Jashtme dhe protokolli i bashkëpunimit ndërmjet dy Dhomave të Tregtisë.