Champions League, shorti vë Ferencvaroshin përballë Skënderbeut

Skënderbeu nuk ka mësuar ende nëse do të luajë apo jo sezonin e ardhshëm në Champions League, por ndërkohë ka mësuar kundërshtarin e tij të raundit të dytë kualifikues. Shorti i së hënës ka vënë përballë kampionëve të Shqipërisë hungarezët e Ferencvaroshit.
Ndeshjet do të zhvillohen në 12 dhe 19 korrik, me takimin e parë që do të luhet në Shqipëri.
Javën e kaluar, Skënderbeu mori fitoren e parë në betejën ligjore që ka nisur me UEFA-n në Arbitrazhin Sportiv.
Të mërkurën, CAS ka pezulluar vendimin e marrë nga Komisioni i Apelit në UEFA më datë 1 Qershor, vendim që përjashtonte skuadrën korçare nga shorti i raundit të dytë eleminator për Ligën e Kampionëve.
Vendimi rikthen kampionët e Shqipërisë në kupat e Europës, por nuk është përfundimtar. CAS do të vendosë më 5 ose 6 korrik për të lënë në fuqi vendimin e UEFA-s, zbutur apo anuluar atë.
Si Skënderbeu, ashtu edhe UEFA kanë rënë dakort që procesi gjyqësor në CAS të kryhet me procedurë të përshpejtuar.
UEFA akuzon Skënderbeun për trukim ndeshjesh në arenën ndërkombëtare dhe dyshon se janë trukuar edhe disa takime në kampionatin shqiptar.Pezullimi i Skëndërbeut, pas dyshimeve për trukime ndeshjesh.