Dëbora dhe shiu i rrëmbyeshëm përfshijnë vendin e vogël ballkanik

Mali i Zi është mbuluar nga dëbora, në ndërkohë që bregdeti malazez i Adriatikut është përfshirë nga shirat e rrëmbyer, për shkak të të cilave rrugët janë bllokuar dhe lëvizja në këto akse rrugore është ndërprerë, njoftoi sot policia malazeze.

”Shumë lagje dhe fshatra në pjesën veriore të vendit kanë mbetur pa energji elektrike”, shtoi ajo.

Për shkak të dëborës është ndaluar lëvizja e kamionëve në pjesën më të madhe të vendit.

Rruga drejt kufirit me Bosnje-Hercegovinën është mbyllur për të gjitha kategoritë e mjeteve transportuese.

Gjatë dy ditëve të fundit në territorin e Herceg Novit kanë rënë 135 litra shi për metër katror dhe ka shtëpi të përmbytura.

Shi i fuqishëm ka rënë edhe në Podgoricë, Nikshiç dhe Cetinjë, ndërsa në pjesën veriore të vendit bie dëborë.

Shtresa e dëborës në qendrën e skive, Zhablak, është mbi një metër. Dëborë ka rënë edhe në Kolashinë, Bjello Polje, Plevle, Berane, Plavë dhe Rozhajë.