Delawie: Veprimet e opozitës dëmtojnë imazhin e Kosovës

Ambasadori i Shteteve të Bashkuara të Amerikës në Kosovë, Greg Delawie, deklaroi sot se veprimet e deputetëve të opozitës dëmtojnë reputacionin e Kosovës dhe qytetarëve të saj.

Gjatë fjalës së tij në konferencën e pestë të Gjyqësorit, ambasadori Delawie theksoi se “një prej objektivave të mi është që ta ndihmojë sistemin e drejtësisë, pasi luftimi i korrupsionit është sfidë e madhe dhe sistemi i drejtësisë në Kosovë është kritikuar shpesh dhe kënaqshmëria e qytetarëve ndaj këtij sistemi është e vogël”.

“Zyrtarë të shumtë vendorë dhe ndërkombëtarë kanë thënë se jo vetëm investitorët e huaj, por edhe vetë kosovarët hezitojnë të investojnë në Kosovë”, u shpreh Delawie.

Ambasadori amerikan Delawie bëri të ditur se SHBA do të investojë vitin e ardhshëm më shumë se 12 milionë dollarë për të ndihmuar sistemin e drejtësisë.

“Gjatë dy muajve të shkuar kemi parë ngjarjet në kuvend, ku një grup i deputetëve kanë zgjedhur gazin lotsjellës në vend të debatit. Ambasada amerikane dhe të tjera kanë reaguar duke thënë se kuvendi nuk është vend ku duhet të përdoret gazi lotsjellës”, tha Delawie.