Dëme të mëdha nga erërat në Malishevë [foto]
Si në shumë vende të tjera të Kosovës në këtë fundjavë edhe Malisheva është goditur nga erërat e forta, të cilat kanë shkaktuar dëme mjaft të mëdha materiale njofton gazeta Koha Ditore.
Përmes një komunikate zyra për informim e kësaj komune ka njoftuar se janë regjistruar raste të dëmeve të mëdha materiale, si dëmtimi i kulmeve të objekteve, e deri te djegia e një restoranti, transmeton Koha.net. Por, që nuk ka pasur dëme në njerëz.
Sipas drejtorit të Drejtorisë për Mbrojtje dhe Shpëtim, Ahmet Morina ekipet e shpëtimit dhe zjarrfikësve kanë arritur të intervenojnë në disa raste.
“Gjatë të shtunës kemi pasur pesë thirrje për ndërhyrje, e ekipet tona kanë intervenuar, ndërsa gjatë natës së mbrëmshme është regjistruar një zjarr i madh në restorant “Rozafa”, i cili është djegur në tërësi, mirëpo, për fatin e mirë, nuk ka pasur dëme në njerëz”, ka thënë Morina.
“Ekipet e zjarrfikësve dhe shpëtimit, me të marrë informatën për zjarr, kanë dalë në vend ngjarje, ndërsa është dashur të merren përforcime shtesë, dhe është intervenuar me tri automjete kundër zjarrit”, ka shtuar më tutje ai.
Sipas kësaj drejtorie, përveç pesë thirrjeve për intervenim dhe këtij zjarri, janë regjistruar edhe dëme tjera, në objekte banimi, lokale afariste dhe objekte shkollore. Së paku në dy shkolla në përfundim e sipër, erërat e fuqishme i kanë dëmtuar kulmet e tyre, njëra në Gurishtë dhe tjetra në Bubavec.
Komuna e Malishevës, sot ka formuar së paku dy ekipe vlerësuese të dëmeve, të cilët, përveç dëmeve të regjistruara, pas informacioneve të marra nga të dëmtuarit, është duke u munduar të regjistrojë edhe dëmet tjera, në çdo vendbanim.
Pas regjistrimit dhe vlerësimit, pritet që komisionet të dalin me vlerësim përfundimtar të dëmeve të shkaktuara, të cilat konsiderohen mjaft të mëdha.
