Digjet automjeti i ministrit Memli Krasniqi
Automjeti i familjes së ministrit të Bujqësisë së Kosovës, Memli Krasniqi, është djegur para banesës së tij në Prishtinë, ndërsa ende nuk dihet se kush e ka kryer këtë vepër penale, e cila sipas burimeve policore është zjarrvënie e qëllimshme.
Në një postim në Facebook, vetë bashkëshortja e Memli Krasniqit ka shkruar për ngjarjen, duke e quajtur një ngjarje absurde djegien e makinës të cilën e përdor për të shoqëruar fëmijët çdo ditë.
Zyrtarja për informim në Policinë e Kosovës, Florije Ahmeti ka thënë përmes telefonit për Top Channel se nuk mund të flasin në këtë fazë për motivet e ngjarjes, pasi, sipas saj, prokurori po e heton rastin.
“Sot, rreth orës 1 të mëngjesit në Rrugën “Hajrulla Abdullahu” është djegur një automjet Passat dhe është dëmtuar një tjetër Renault Clio që ishte në afërsi. Policia është duke hetuar “, tha Ahmeti.
