Dosjet e përgjysmuara të korrupsionit

Në Prokurorinë Themelore të Prishtinës, një prokuror nuk raporton pesë raste të korrupsionit.

Shkaqet që kanë penguar në zgjidhjen e lëndëve të korrupsionit dhe krimit të organizuar, nuk kanë të bëjnë vetëm me mosguximin e prokurorëve, por edhe me mënyrën se si janë administruar këto lëndë gjatë procedimit.

Thënë ndryshe, ka të bëjë dhe me përgatitjen e tyre profesionale dhe jo vetëm.

Sipas Komisionit të verifikimit të të dhënave, të ngritur nga Këshilli Prokurorial, janë dhe një sërë problematikash që janë konstatuar në prokuroritë e vendit.

“Mosidentifikimi i kallëzimeve penale në regjistrat përkatës nga ana e shefave të shkrimores, mosraportimi i të gjitha kallëzimeve penale nga ana e prokurorëve, administrimi i keq i dosjeve të kallëzimeve penale, raportimi i veprimeve dhe vendimeve nga zyrtarët jokompetentë, në këtë rast nga sekretarët juridikë, mospërdorimi i vulave të pranimit në të gjitha rastet e pranuara nëpër prokurori e të tjera”, radhiten si disa nga shkaqet që kanë penguar procedimin e lëndëve të korrupsionit dhe krimit të organizuar.