Ervin Demo: Reforma territoriale synon bashki më të forta dhe shërbim më cilësor

Ministri i Shtetit për Pushtetin Vendor, Ervin Demo, pas mbledhjes së Këshillit të Ministrave, nxori në pah rëndësinë e përfshirjes së të gjitha palëve në diskutimin për reformën territoriale. Ai theksoi se bashkitë, qarqet dhe qytetarët duhet të shprehin opinionet e tyre mbi këtë reformë, që ka për qëllim përmirësimin e shërbimeve në terrritor.

“Jam i kënaqur që ky proces ka nisur, edhe pse dëshironim që të fillonte më herët. Është e nevojshme që të gjithë aktorët, si dhe të gjithë të tjerët që preken nga kjo reformë, të japin mendimet dhe qëndrimet e tyre në lidhje me situatat e evidentuara gjatë 10 viteve të fundit,” u shpreh Demo. Ai gjithashtu vuri në dukje se Komisioni do të adresojë disa çështje lidhur me funksionet e bashkive.

Demo pranoi se qeveria qendrore nuk do të pajtohet gjithmonë me bashkitë, por theksoi se qëllimi kryesor është të sigurohet që bashkitë, me kompetencat e deleguara dhe ato që burojnë nga ligji, të jenë më të fuqishme dhe të ofrojnë shërbime më të mira në territor. Ai shtoi se do të dëgjohen shumë kryetarë bashkish dhe aktorë të tjerë që mund të kenë këndvështrime të ndryshme mbi reformën.