FMN në 26 Gusht në Tiranë, analizë sistemit financiar

Një mision i Fondit Monetar Ndërkombëtar (FMN) pritet të mbërrijë në 26 gusht në Tiranë ku në dy javë do të zhvillojë takime zyrtare mbi situatën ekonomiko-financiare shqiptare.

Burime të ministrisë së Financave bënë të ditur sot për ATSH-në, se misioni i FMN-së do të analizojë gjithë sistemin e financave publike.

Në qendër të axhendës së takimeve me qeverinë do të analizohen zhvillimet e fundit makroekonomike, perspektiva e rritjes, bilanci i pagesave, kushtet fiskale, struktura e borxhit dhe parashikimet, qëndrueshmëria e borxhit, diskutimi i strategjisë së menaxhimit të borxhit të brendshëm dhe të jashtëm.

Nevojat për financim afatmesëm, për politikat mbi mbështetjen e investimeve të huaja dhe mënyrat për të reduktuar varësinë nga bankat tregtare, pritet të jenë gjithashtu pjesë e analizave në takimet zyrtare.

Pjesë e axhendës së takimeve të misionit pritet të jenë analiza e treguesve të derisotëm të buxhetit 2014 dhe hartimi i projekt-buxhetit 2015, si pjesë e kontrollit financiar që parashikon gjendjen financiare dhe makroekonomike të ekonomisë shqiptare.