Heidi Lushtaku, kosovarja që po pushton pasarelat e botës

Ajo është një prej shqiptareve më të bukura, imazhi i së cilës përfaqësohet sot suksesshëm në botën ndërkombëtare të modës.

Heidi Lushtaku, 23-vjeçarja me origjinë kosovare, ka shkëlqyer në botën e bukurisë. Ajo e ka nisur karrierën e modelingut prej moshës 13-vjeçare, por suksesi i saj shpërtheu menjëherë pas pjesëmarrjes në “Miss Zvicra 2013”. Heidi, një prej 5 vajzave me origjinë shqiptare që konkurruan në këtë kompeticion bukurie, ishte pretendetja kryesore për kurorën e më të bukurës së Zvicrës. Megjithatë, juria i dha vendin e 6.

Heidi ka nisur tashmë suksesshëm karrierën e saj si modele dhe kulmin e ka arritur në kontinentin aziatik, ku prej afro dy muajsh ia doli të sfidojë tajlandezet me bukurinë e saj ekzotike. Kjo eksperiencë në Bangkok të Tajlandës i hapi 23-vjeçares dyert e modës ndërkombëtarisht, e tashmë vajza me origjinë shqiptare ka firmosur disa kontrata të rëndësishme.

E kudo shkel, Heidi nuk harron të përmendë vendlindjen e saj, Kosovën. Ajo është fëmija e një familjeje të madhe, me 7 motra e vëllezër të tjerë. E lindur në Vushtri, edhe pse është larguar nga vendi i saj shumë e vogël, lidhjet me të janë ende të forta.