Indeksi i Perceptimit të Korrupsionit, TI: Shqipëria, përmirësim të lehtë

Transparency International ka publikuar këtë të mërkurë Indeksin e Perceptimit të Korrupsionit për vitin 2015, ku vihet re një përmirësim i lehtë në të dhëna për Shqipërinë.

Për vitin 2015, vendi ynë shënon 36 pikë, dhe renditet në vendin e 88-të nga 168 vende. Një vit më parë, Shqipëria kishte 33 pikë dhe renditej në vendin e 110, nga 175 vende ku është matur indeksi i korrupsionit.

Megjithatë pavarësisht një përmirësimi të lehtë, Shqipëria, Bosnja dhe Kosova janë tre vendet që janë shumë larg në renditje nga vendet e rajonit. Nga vendet e rajonit Mali i Zi renditet në vendin e 61-të, Maqedonia e 66-ta, Serbia e 71-ta dhe Bosnja dhe Hercegovina në vendin e 76-të.

Nëse do të krahasojmë katër vitet e fundit, shohim një përmirësim të pikëve të Shqipërisë në perceptimin e korrupsionit, me 33 pikë në 2012, 31 në 2013, 33 në 2014, dhe 36 pikë në 2015.

Në rang botëror renditet e para sërish Danimarka me 91 pikë, ndërsa vendi i fundit ndahet mes Koresë së Veriut dhe Somalisë me nga 8 pikë.