INSTAT: Inflacioni në tetor 2.1 %, ushqimet dhe pijet me rritje
INSTAT tregon se inflacioni i muajit tetor është në nivelin e 2.1 %, me një rënie të lehtë krahasuar me një muaj më parë që ishte 2.2 %, ndërsa krahasuar me tetorin e vitit të shkuar është rritur me 0.7 %. Grupi i mallrave që ka pësuar më tepër rritje ka qenë “Ushqime dhe pije joalkoolike”me +2,17 pikë përqindje, ndjekur nga “Pije alkoolike dhe duhan” me +0,22 pikë përqindje. Peshë në këtë ndryshim çmimesh e ka dhënë edhe grupi “Shërbimi arsimor” me +0,07 pikë përqindje. Çmimet e grupit “Hotele, kafene e restorante” kanë kontribuar me +0,03 pikë përqindje. Ndërsa “Qira, ujë, lëndë djegëse dhe energji” kanë parë ulje çmimi me -0,23 pikë përqindje. Grupe si “Transporti” kanë kontribuar me -0,13 pikë përqindje. Çmimet e grupit “Veshje dhe këpucë” kanë kontribuar me -0,19 pikë përqindje. Çmimet e grupit “Shëndeti” kanë kontribuar me -0,02 pikë përqindje.
Sipas raportit, Ndryshimet vjetore të grupeve kryesore:
Krahasuar me muajin Tetor 2014, rritja më e madhe e çmimeve vërehet në grupin “Pije alkoolike dhe duhan” me 6,1 %, pasuar nga grupi “Shërbimi arsimor” me 4,8 %. Çmimet e grupit “Ushqime dhe pije joalkoolike” u rritën me 5,5 %. Brenda këtij grupi çmimet e nëngrupit “zarzavate përfshirë patatet” u rritën me 27,8 %, pasuar nga nëngrupi “fruta” me 15,4 %, nëngrupi “vajra dhe yndyrna” me 2,1 %, nëngrupi “sheqer, reçelna e ëmbëlsira” me 1,6 %, etj. Çmimet e nëngrupit “qumësht, djath e vezë” u ulën me 2,7 %, pasuar nga nëngrupi “kafe, çaj e kakao” me 0,7 %, etj. Ndërsa, ulja më e madhe e çmimeve vërehet në grupin “Veshje dhe këpucë” me 3,7 %, pasuar nga grupi “Transporti” me 2,1 %, grupi “Qira, ujë, lëndë djegëse dhe energji” me 1,4 % etj.
Ndryshimi mujor i indeksit është 0,01 %:
Krahasuar me muajin Shtator 2015, rritja më e madhe e çmimeve vërehet në grupin “Shërbimi arsimor ” me 3,9 %. Brenda këtij grupi tarifat e studimeve në universitetet publike u rriten me 6,7 %. Ulja më e madhe mujore vërehet në grupin “Mallra dhe shërbime të ndryshme ” me 0,4 %.
