Ja si do të shkruajë administrata nga sot e tutje

Shkresat zyrtare në të gjitha institucionet shtetërore do të jenë të njësuara dhe me modele të paracaktuara, duke unifikuar dhjetra formate shkresash që burojnë nga institucionet shtetërore.

Modelet janë miratuar si pjesë e Rregullores së njësuar të punës me dokumentet në autoritetet publike të Republikës së Shqipërisë, të miratuar nga Këshilli i Lartë i Arkivave dhe të botuar në fletoren zyrtare.

Këto modele të njësuara do të jenë objekt inspektimi nga Drejtoria e Përgjithshme e Arkivave dhe në rast se nuk zbatohen, atëherë do të ketë masa administrative, deri në gjoba ndaj drejtuesve të institucioneve.

“Nga sot, të gjitha institucionet janë të detyruara të zbatojnë rregulla të njësuara të punës me dokumente, përfshi dhe standardin e njësuar të shkresës zyrtare! Jo më njëqind formate shkresash që burojnë nga institucionet shtetërore të vendit tonë! Vendimi nr. 4 i KLA-së i botuar në Fletoren Zyrtare”- shkruan në rrjetet sociale, Drejtori i Përgjithshëm i Arkivave, njëherazi kryetar i Këshillit të Lartë të Arkivave, Ardit Bido.

Rregullorja e njësuar e punës me dokumentet përcakton edhe detyrimet e institucioneve për përpunimin, ruajtjen dhe restaurimin e dokumenteve, si dhe afatet konkrete kur institucionet duhet të nxjerrin aktet administrative që mundësojnë procedurat e nevojshme.

Gjithsesi, njësimi i shkresës zyrtare me modele të paracaktuara, përbën elementin më të rëndësishëm të rregullores.