Kandidat për zgjedhjet presidenciale në Francë, Edouard Philippe përballet me hetim për përvetësim parash

Prokurorët francezë urdhëruan të martën një hetim ndaj kandidatit presidencial të vitit 2027, Edouard Philippe, për akuzat për përvetësim parash.

Autoriteti Financiar Kombëtar i Francës hapi një hetim mbi akuzat se Philippe, në rolin e tij si kryetar bashkie dhe kreu i autoritetit rajonal të Le Havre, favorizoi një organizatë jofitimprurëse të drejtuar nga një aleat për të mbikëqyrur projektet e lidhura me qendrën dixhitale të qytetit.

Sipas një deklarate nga prokurori financiar i Francës Pascal Prache, Philippe po hetohet për përvetësim të dyshuar të fondeve publike, favorizim dhe konflikt të paligjshëm interesi.

Philippe, i cili është gjithashtu një ish-kryeministër, thuhet se do të bashkëpunojë plotësisht me hetuesit pasi prokurorët financiarë urdhëruan një hetim gjyqësor mbi akuzat për përvetësim, tha të martën një zyrtar lokal.

Ai e mori qetë hapjen e hetimit kundër tij, tha zyrtari i autoritetit rajonal të Le Havre.

“Sigurisht, ai do t’u përgjigjet të gjitha pyetjeve që magjistratët do t’i bëjnë në një mënyrë shumë të qetë, siç ka bërë gjithmonë”, tha zyrtari.

Agjencia e lajmeve AFP-së deklaron se hetimi u nxit nga një informator i cili raportoi sjelljen e dyshuar të pahijshme në shtator 2023.

Konflikti i dyshuar i interesit ka të bëjë me një kontratë publike me vlerë mbi 2 milionë euro që autoriteti rajonal i Le Havre nënshkroi me një organizatë bamirëse të quajtur LH French Tech në korrik 2020. LH French Tech drejtohej nga këshilltarja lokale Stéphanie de Bazelaire.

Hetimi vjen në një moment të ndjeshëm për Philippe-in. Më herët këtë muaj, ai nisi fushatën e tij për zgjedhjet presidenciale të vitit të ardhshëm , duke i dhënë fund spekulimeve se kur ish-kryeministri do të bënte lëvizjen e tij për në Elysée.

Sondazhet e hershme sugjerojnë se Philippe është një nga kandidatët më të mirë në pozicion për të mposhtur udhëheqësit e ekstremit të djathtë Jordan Bardella dhe Marine Le Pen, të cilët janë favoritët aktualë.