Koçi: Anëtarësimi i vendit në NATO, një nga sfidat e rëndësishme të FA

Në ambientet e Bazës Ajrore të Helikopterëve në Farkë u zhvillua sot një ceremoni me rastin e e 64-vjetorit të krijimit të Aviacionit Ushtarak Shqiptar.

 Në ceremoni ishin të pranishëm: zv.ministri i Mbrojtjes, Petro Koçi, shefi i Shtabit të Përgjithshëm të FA-ve, gjeneralmajor Jeronim Bazo, ushtarakë të lartë të Forcës Ajrore, ish-drejtues të Aviacionit Luftarak Shqiptarë ndër vite, ish-pilot dhe veteranë të kësaj arme, si dhe mjaft të ftuar të tjerë.

Zv.ministri i Mbrojtjes, Petro Koçi, u ka uruar të pranishmëve 64-vjetorin e krijimit të Aviacionit, duke e cilësuar si një ditë të veçantë jo vetëm për Forcën Ajrore, por për të gjithë Forcat tona të Armatosura.

Më tej, Koçi ka nënvizuar se, në këtë ditë ne shohim me krenari një rrugë të përshkruar me sakrifica, përpjekje e përkushtim të madh, por edhe me plot realizime në fushën e mbrojtjes së hapësirës tonë ajrore. Në këtë rrugë, jo pak pilotë dhe teknikë të devotshëm të kësaj arme kanë dhënë jetën e tyre në përpjekje për zbatimin e detyrave. Ata do të mbeten në kujtesën tonë shqiponja të hekurta, shqiponja të pavdekshme. Të gjitha këto sakrifica dhe realizime ndër vite kanë hedhur themele të sigurta për ecjen e mëtejshme të kësaj arme, të ruajtjes së traditave të mira dhe për të çuar më tej arritjet e paraardhësve. “Anëtarësimi i vendit tonë në NATO ishte një nga sfidat e rëndësishme të FA-së dhe në këtë drejtim një kontribut të çmuar ka dhënë edhe Forca Ajrore, e cila është udhëhequr nga objektiva të qarta, të mirëpëcaktuara me prioritete e faza zhvillimi për të realizuar me nder misionin e caktuar”, është shprehur zv.ministri Petro Koçi.

Në këtë ceremoni ka përshëndetur edhe gjeneral brigade (R) Astrit Jaupi, ish-komandanti i Forcës Ajrore dhe ish-pilot i mirënjohur i armës së Aviacionit.

Më pas, zv.ministri i Mbrojtjes, Petro Koçi dhe shefi i Shtabit të Përgjithshëm të FA-ve, gjeneralmajor Jeronim Bazo, kanë vizituar nga afër mjediset e Bazës Ajrore të Helikoptërve në Farkë.