Konkursi “Ëndrra Ime 2015″ Rama shpall fituesit nga gjithë vendi

Komisioni i posaçëm përzgjedh 30 projektet që do të financohen nga qeveria

Artemisa Hoxha

Konkursi i shpallur rreth një muaj më parë nga vetë kreu i qeverisë, Edi Rama “Ëndrra Ime 2015″ është mbyllur dje, ku ka qenë vetë Kryeministrit që ka bërë publike në profilin e tij zyrtar në Facebook, listën me 30 emrat e përzgjedhur. Edhe pse në fillim të lançimit të këtij konkursi në profilin e tij kreu i qeverisë përcaktonte se fituesit do të ishin vetëm 10, dje ai ka bërë publike listën me 30 emrat që kanë dalë fitues nga 734 aplikantë që kanë paraqitur idetë për projektet e tyre. Vlerësimi i përzgjedhjes së kandidatëve është bërë nga një komision i posaçëm i ngritur nga vetë Kryeministri, i cili ka analizuar çdo projekt-ide nga aplikantët nga i gjithë vendi.  Fituesit e këtij konkursi do të financohen nga buxheti i qeverisë për të vënë në realitet idetë e tyre. Por për të mos kufizuar kreativitetin dhe inovacionin e ideve, Kryeministri shkruan në faqen e tij se “nuk do të shpallim një limit buxheti në këtë thirrje, por përparësi do të marrin ata që do të arrijnë të shpalosin një ide të mirë nga njëra anë dhe me një buxhet realist nga ana tjetër”. Gjithsesi, fituesit e këtij konkursi pritet që të njoftohen nga vetë komisioni i posaçëm në lidhje me fazën e dytë të realizimit të projekteve fituese. “Duke qenë se dëshirat dhe propozimet ishin të shumta, por edhe duke pasur parasysh se ishte hera e parë që një program i tillë vihej në dispozicion të të rinjve, në ditët në vijim do të shpallet një thirrje e dytë për projekte dhe në qershor do të ketë një tjetër grup fituesish”, shkruan kreu i qeverisë.

Fituesit

Projektet fituese në vetvete trajtojnë një problematikë të caktuar, që sipas aplikantëve në këtë konkurs, me ndihmën e qeverisë mund që të gjejnë zbatim në zgjidhjen e tyre. Projektet e përzgjedhura prekin tema të caktuara si p.sh: trajnimin e të verbërve përmes një programi kompjuterik për nevojat e tyre, pastrimin e liqenit të Tiranës nga mbetjet biologjike dhe mbeturinat e hedhura në një thellësi deri 1.8 m, për krijimin e bibliotekës së shkollës “Sadi Nuri” përmes organizimit vullnetar, krijimin e portalit që do të katalogojë, promovojë dhe shesë punime artizanale, për krijimin e një aplikacioni që u vjen në ndihmë me informacion në kohë reale udhëtarëve të transportit publik urban. Tjetër projekte që do të vihen në zbatim falë mbështetjes që do të japë Kryeministri kanë të bëjnë me rehabilitimin vullnetar të një parku në qytetin e Vlorës, për trajnimin e gjuhës së shenjave dhe rritjen e ndjeshmërisë sociale ndaj personave me probleme në të folur e në dëgjim, ngritjen e Akademisë Sociale të Futbollit, atë të vënies në skenë në Amfiteatrin e Durrësit të veprave me famë botërore, riciklimi i shisheve plastike që transformohen në material për dekor artistik në shkolla. Projekte të tjera përfshinë promovimin e fshatrave të ndryshme apo dhe bizneseve të ndryshme në vend, në kuadër të rritjes së vizitorëve shqiptarë dhe të huajë në këto zona.