Konsullja në Milano, kërkesë gazetës “Corriere della Sera” për korrigjimin e artikullit

Konsullja e Përgjithshme e Republikës së Shqipërisë në Milano, Luljeta Çobani, i ka kërkuar sot gazetës italiane “Corriere della Sera” që të korrigjojë artikullin e  datës 19 tetor.

“Si lexues i vëmendshëm i gazetës suaj tregova vëmendje për artikullin e botuar më datë 19 tetor 2014, në Seksionin Lajme nga Bota që mban firmën e Andrea Galli-t, me titullin domethënës “Limuzinë dhe proshutë – 48 orët e fshehta të Liderëve”, me nëntitull: “…pas kuintave të boshtit milanez”, ku përshkruhen veprimtaritë private të anëtarëve pjesëmarrës në takimin Evropë – Azi, përtej angazhimeve institucionale. Dolën qartë qëllimet për të kënaqur interesin e opinionit publik mbi çështjen në fjalë, madje të karakterizuara nga ngjyrime të forta thashethemesh”, shkruan Çobani në nje letër drejtuar gazetës.

“Në pjesën e fundit dhe sidomos në pesë rreshtat e fundit shfaqet ky pohim: “Një grup jo i vogël në numër i delegacionit shqiptar, sapo mundi, ia mbathi për në Liguria. Jo për detin, por për Kazinonë e Sanremos”. Firmosur Andrea Gallo. Ky lajm nuk u pëlqye aspak nga unë i nënshkruari dhe aq më shumë nga përfaqësuesit e Qeverisë së Republikës së Shqipërisë dhe institucionet e saj, shkruan Konsullja Çobani.

“Në fakt, ju bëj me dije se Republika e Shqipërisë nuk ishte e pranishme në takimin Evropë – Azi. Pra, nuk ka dërguar aty asnjë pjesëmarrës, as në nivel vëzhguesi dhe nuk kishte në takim asnjë drejtues qeveritar shqiptar. Për këtë arsye lajmi i shpërndarë është i pavërtetë dhe i pabazë”, vijon Çobani. “Edhe më shumë është e tillë përmbajtja e fjalisë së mësipërme, tejet cënuese për imazhin dhe dinjitetin e personave këtu të përmendur, për çdo vend të cilit do i përktinin apo i përkasin në rast se lajmi nuk përkon me të vërtetën; aq më shumë ishte ajo për imazhin e vendit që unë i nënshkruari përfaqësoj në qytetin e Milanos”.

“Në të vërtetë, Republika e Shqipërisë nuk është ndër vendet anëtare të këtij boshti dhe as nuk ka qenë zyrtarisht e ftuar”, theksoi Konsullja në Milano. Megjithatë, vijon Konsullja Çobani, “lidhja e rreme (dhe shpresoj të jetë vetëm e gabuar) e kësaj sjelljeje që u është veshur përfaqësuesve të Republikës së Shqipërisë cenoi rëndë imazhin e Shtetit dhe të Qeverisë së Republikës së Shqipërisë. Për më tepër, lajmi pati një jehonë të menjëhershme dhe negative në mediat kombëtare, duke ngjallur bujë në vend”.

“Zgjedh të mos bëj asnjë lloj komenti mbi mënyrën se si është mbledhur ky lajm i gabuar. Për këtë arsye, me respekt dhe mirësjellje, por me vendosmërinë e detyrës që mbuloj, ju bëj ftesë zyrtare për një korrigjim të menjëhershëm të tekstit të artikullit të sipërtreguar, të shoqëruar nga një deklaratë e gjerë dhe shpjeguese në të cilën të sqarohet dhe saktësohet që asnjë delegacion shqiptar nuk ka qenë i pranishëm në takimin Evropë – Azi dhe se mbi të gjitha, asnjë drejtues apo përfaqësues i Qeverisë Shqiptare nuk ka nxituar të shkojë në det apo, edhe më keq, në Kazinonë e Sanremos. Pres që në respektim të nenit 8 të Ligjit nr. 47/1948 dhe ndryshimeve të mëvonshme, kjo kërkesë për korrigjim dhe deklarata shpjeguese, për rëndësinë e cënimit ndaj një Shteti Sovran dhe Qeverisë që aktualisht e përfaqëson atë, të zbatohet menjëherë me jehonë të gjerë dhe me të njëjtat karakteristika tipografike që tërheqin vëmendjen e lexuesit, në faqet kryesore të gazetës që ju drejtoni”, përfundon letrën e saj Konsullja  e Përgjithshme e Republikës së Shqipërisë ne Milano, Luljeta Çobani.