Konsumohet pa asnje kandidat raundi i pare i zgjedhjes se presidentit
Mungesa e kandidatëve për president ka çuar në dështimin e raundit të parë të procesit për zgjedhjen e Presidentit të ri të Shqipërisë.
Kreu i Kuvendit ka lexuar kushtet që parashikon ligji për zgjedhjen e Presidentit dhe më pas i ka kaluar fjalën kryetares së komisionit parlamentar të ligjeve Vasilika Hysi e cila lexoi raportin ku deklarohet se nuk ka asnjë kandidat për President.
“Komisioni u mblodh sot sipas përcaktimeve të rregullores së kuvendit. Komisioni përcaktoi se asnjë kandidat nuk është paraqitur. Në këto kushte Komisioni në zbatim të Kushtetutës, i paraqet seancës plenare këtë raport me qëllim mbylljen e procedurave për raundin e parë të zgjedhjes së Presidentit”, tha Hysi.
Pas saj, kreu i Kuvendit Ilir Meta tha se raundi i parë quhet i ezauruar dhe ftoi konferencën e kryetarëve të mblidhet për të vendosur datën e ardhshme të raundit të dytë.
