Korçë, ambasadorët e huaj kërkojnë nisjen e reformës në drejtësi

Në një takim të organizuar nga OSBE-ja në qytetin e Korçës, me emrin “Për një drejtësia pa vonesa”, kreu i prezencës Florian Raunig, ka lëshuar një apel që reformat strategjike në Shqipëri duhet të fillojnë menjëherë.

Sipas tij, Shqipëria duhet të ecë përpara në rrugën e demokracisë dhe njerëzit të besojnë tek drejtësia.

“Shqipëria ka nevojë për një reformë themelore të mënyrës se si funksionin sistemi i drejtësisë, – tha Raunig. – Kjo reformë, që duhet të përfshijë të gjithë aktorët, duhet të jetë strategjike, me qëllim që t’u japë drejtësi të gjithë qytetarëve. Unë mendoj se proceset e zgjatura gjyqësore dëmtojnë imazhin e vendit”.

I pranishëm në këtë takim, ka qenë edhe Kryetari i Gjykatës së Lartë, Xhezair Zaganjori, i cili pranoi vështirësitë në sistemin e drejtësisë: “Jemi gati të bashkëpunojmë me partnerët tanë ndërkombëtarë. Mendimi i publikut për gjyqësorin është në nivele të ulëta, por me nisjen e reformave gjithçka duhet të ndryshojë”.

Edhe ambasadori amerikan Aleksandër Arvizu theksoi se proceset gjyqësore në Shqipëri, zgjasin dhe zvarriten shumë. Ai u shpreh se programi për një drejtësi pa vonesa, është një qasje praktike: “Shpreh besimin se sistemi i gjykatave në Shqipëri mund të përmirësohet”.