Kryeministri kinez në vizitë zyrtare për riforcimin e bashkëpunimit financiar

Kryeministri kinez, Li Keqiang mbërriti dje në Kili për një vizitë dyditore gjatë të cilës ai do të takohet me presidenten, Michelle Bachelet, në kuadër të bashkëpunimit financiar.

“Bashkëpunimi financiar do të zërë një vend të rëndësishëm në këtë vizitë”, deklaroi ministri kilian i Punëve të Jashtme, Heraldo Muñoz, i cili priti zyrtarin kinez në aeroportin e Santiagos.

Vizita e Li-së parashikon të riforcojë lidhjet ekonomike të Kinës me Kilin, vendi i parë latino-maerikan me të cilin Pekini nënshkroi një traktat për tregtinë e lirë në vitin 2006.

Marrëveshje, përmbajtjet e të cilave nuk u zbuluan, do të nënshkruhen mes dy vendeve.

Kryeministri kinez do të japë gjithashtu një konferencë në selinë e Komisionit ekonomik për Amerikën latine dhe Karaibet (CEPAL) në Santiago.

Kili është etapa e fundit e kryeministrit kinez, Li në Amerikën latine, pas Brazilit, Kolumbisë dhe Perusë.