Kuvend, rinis seanca, flet deputeti Mark Frroku

Seanca e Kuvendit rinisi punimet me fjalën e deputetit Mark Frroku, i akuzuar nga Prokuroria “për dëshmi të rreme”, bashkë me deputetin Tom Doshi. Frroku e cilësoi “të nxituar dhe denigruese” akuzën e Prokurorisë, ndërsa i kërkoi kolegëve deputetë që “mos i hapin rrugë këtij precedenti shumë të rrezikshëm”.

Seanca po vijon me leximin e raportit të Këshillit të Rregullores nga deputeti socialist Armando Subashi. Raporti u miratua dje me konsensus nga deputetët e të dy palëve në Këshill.
Më herët, nënkryetari i Kuvendit, Vangjel Dule pas debateve mes palëve lidhur me procedurën e shqyrtimit të kërkesës së Prokurorisë së Përgjithshme që kërkon autorizimin e Parlamentit për arrestimin e dy deputetëve Tom Doshi dhe Mark Frroku, të akuzuar për dëshmi të rreme.
Ndërprerja e seancës erdhi pas debateve mes palëve lidhur me procedurën që do ndiqej në shqyrtimin e kërkesës së organit të akuzës.
Në fillim të seancës ndërhyri për procedurë kryetari i grupit parlamentar të PD-së, Edi Paloka tha se tani sapo na erdhi raporti i Këshillit të Rregullores, i përgatitur nga deputetët e mazhorancës, ku shohim të përfshirë dhe mendimin e opozitës. “Mendimi i opozitës do të paraqitet nga deputetët e saj. Këtë mendim do ta japë deputeti Halimi”, tha Paloka.
Në reagimin e tij nënkryetari i Kuvendit, Dule tha se me kërkesë të anëtarëve të opozitës në Këshill, u ra dakord që në këtë raport të artikulohet dhe mendimi i opozitës i cili edhe është përfshirë. Nëse opozita kërkon të ketë raportin e saj pa asnjë problem ai do të lexohet në seancë.
Ndërsa ish-kryetarja e Kuvendit, JozefinaTopalli tha se rregullorja e parashikon që votimi i raportit në parlament të bëhet pas 48 orësh.
Më pas ndërhyri ish-kryeministri Sali Berisha, i cili akuzoi maxhorancën se po bllokon paraqitjen e provës që pretendon deputeti Doshi.
Pas replikave mes deputetëve të opozitës dhe drejtuesit të seancës, Vangjel Dule, ndërhyri kryeministri Edi Rama, i cili kërkoi respektimin e rregullores parlamentare. “Klubi i Shtëpisë së Oficerave t’i japë fund historisë kur në parlament ne bëhemi dëshmitarë të shkeljes së rregullores. Zbatoni rregulloren siç ajo e përcakton. Nuk mund të vazhdojmë çdo të enjte t’i japim popullit shqiptar një pamje të shëmtuar”, iu drejtua kryeministri nënkryetarit Dule.