LSDM: Marrëveshje konkrete ndërpartiake deri të premten

Nënkryetari i partisë opozitare maqedonase, LSDM, Damjan Mançevski ka paralajmëruar se nga e premtja do fillojë realizimi konkret i marrëveshjes ndërpartiake për daljen e Maqedonisë nga kriza politike.

Sipas Mançevskit, grupet e punës të katër partive parlamentare janë duke realizuar takime, që kryesisht shërbejnë për matjen e pulsit të ndërsjellë mes tyre, si dhe për të vlerësuar se ku duhet lëshuar pe e ku jo gjatë bisedimeve.

Mançevski ka deklaruar për mediat se LSDM-ja pret edhe zgjidhje konkrete për reformat që kanë të bëjnë me listën zgjedhore. Jozyrtarisht mësohet se mbi 200 mijë votues në Maqedoni janë fiktivë dhe në mesin e tyre ka edhe me dhjetëra mijë të vdekur.

“Deri më tani nuk ka përparim, por pritet që deri të premten të ketë propozime konkrete, të cilat do të ishin thelbësorë e do na çonin drejt arritjes së një marrëveshjeje. Në këtë fazë ka shumë ide, të cilat po analizohen dhe janë vënë në dispozicion të gjitha mundësitë e mundshme”, ka deklaruar Mançevski.