Maksuti: Maqedonia e ka vendin në NATO dhe BE
Sipas zëvendës ministrit të mbrojtjes të Maqedonisë, Bekim Maksuti, anëtarësimi i Maqedonisë në NATO nuk është lënë në plan të dytë.
“Është e saktë se gjendemi në një krizë politike e cila po na largon të gjithëve nga procesi euro-integrues në BE dhe në NATO. Të gjithë bashkërisht, edhe qeveria edhe shoqëria civile edhe opozita duhet që të punojmë që Republika e Maqedonisë ta gjeje vendin e saj atje ku i takon. Ai vend është bashkërisht krah me krah me të gjitha vendet anëtare në NATO dhe në BE. Këtë gjë e kemi dëshmuar nga praktika e deritanishme me pjesëmarrjen në misionet e paqes dhe përcaktimin tonë që të jemi pjesë e NATO-së dhe BE-së”, ka deklaruar Maksuti.
Ndryshe, Bekim Maksuti, e mori këtë post qeveritar para pak kohësh, kur BDI-ja bëri disa ndryshime të kuadrove të saj, duke tërhequr fytyrat e vjetra, për t’u lënë hapësirë të rinjve.
