Mançester, ISIS merr përsipër sulmin. May: Jemi sërish në shënjestër

Shteti Islamik ka marrë përgjegjësinë për sulmin në Mançester, duke pranuar përmes agjencisë “Amaq”, që një nga anëtarët e tij, ka kryer sulmin në sallën e koncerteve “Arena”.  Lajmi bëhet i ditur nga “Site”, sajti amerikan i monitorimit mbi ekstremizmin në internet.

Ajo në Mançester ishte “një sulm barbar kundër personave të pafajshëm dhe të rinjve të pambrojtur”. Kështu ka deklaruar kryeministrja britanike Theresa May, e cila duke iu drejtuar kombit me një mesazh pas masakrës në koncert, ka shpjeguar që “shumë të plagosur janë në gjendje të dëshpëruar”.

Policia ka nënvizuar, “e njeh identitetin e atentatorit, por në këtë pikë të hetimeve nuk mund ta publikojmë”. Por May ka paralajmëruar “për një tjetër atentat të mundshëm. Niveli ni kërcënimit mbetet i lartë, kjo do të thotë se mund të ketë atentate të tjera”.

“Hetuesit, – vazhdon kryeministrja britanike, – theksojnë se autori ka vepruar i vetëm, por po punohet për të verifikuar nëse bëhet fjalë për ndonjë grup të zgjeruar”.

May i ftoi pastaj qytetarët britanikë të kujtojnë gjestet e solidaritetit që janë shtuar pas atentatit të së hënës për të ndihmuar familjarët e viktimave.

Bomba e përdorur nga atentatori vetëvrasës përmbante gozhda në brendësi të saj për të shkaktuar sa më shumë dëme. “Manchester Arena”, është salla më e madhe e koncerteve në Europë, me një kapacitet prej më shumë se 21 mijë vendesh. Në momentin e shpëethimit, ajo ishte e mbushur me të rinj dhe të reja. Në atentat, humbën jetën 22 persona dhe u plagosën rreth 60 të tjerë, pjesa më e madhe fëmijë dhe adoleshentë, fansa të këngëtares amerikane, Ariana Grande.