Manjani në Turqi, bashkëpunim kundër trafiqeve

Ministri i Drejtësisë, Ylli Manjani, i cili ndodhet për një vizitë zyrtare në Turqi, zhvilloi një takim dypalësh me homologun turk Bekir Bozdag, ku diskutuan për forcimin e bashkëpunimit reciprok mes dy vendeve dhe veçanërisht bashkëpunimin në fushën e drejtësisë për të luftuar fenomenet e përbashkëta kriminale.

Duke u përqendruar te çështjet e drejtësisë, Manjani theksoi rëndësinë e forcimit të masave ligjore anti-terror dhe anti-krim.

Në këtë kontekst, dy ministrat diskutuan për shkëmbimin e informacioneve dhe përvojave për të trajtuar me sukses luftën kundër krimit dhe trafiqeve.

Gjithashtu, ata ranë dakord edhe për detajimin e protokolleve të bashkëpunimit për t’i shërbyer më mirë qytetarëve të dy vendeve si dhe ndanë bindjen për t’u angazhuar në ndërtimin e lehtësira ligjore për komunitetin e biznesit në të dy vendet tona.

“Turqia është partner i rëndësishëm strategjik në rajonin tonë. Forcimi i bashkëpunimit sektorial është rëndësishëm”, tha Manjani.