Maqedoni, Zaev publikon përgjimet e PDSH-së dhe BDI-së

Çështja

Ndërsa policia maqedonase e ka akuzuar dje për dyshim mitëmarrjeje në një vlerë prej 200 mijë eurosh, e kryer në vitin 2013, lideri i partisë opozitare maqedonase, LSDM, Zoran Zaev, ka kërkuar dorëheqjen e menjëhershme të qeverisë së Nikolla Gruevskit dhe ka publikuar nga ana tjetër, përgjigjet e reja që sjellin në fokus liderët e partive shqiptare në republikën fqinje. Në konferencën për shtyp dje, në Shkup, u publikuan disa biseda të përgjuara që, sipas Zaev, janë zhvilluar mes midis shefit të shërbimit sekret maqedonas, Sasho Mijallkov, me zëvendëskryeministrin Musa Xhaferri dhe me kryetarin e PDSH-së opozitare, Menduh Thaçi, që dëshmojnë lidhjet e disa politikanëve shqiptarë me zyrtarët maqedonas. Në bisedën e parë që, sipas opozitës, zhvillohet midis shefit të policisë sekrete Sasho Mijallkovi, dhe zyrtarit të lartë të BDI-së, Musa Xhaferri, ky i fundit dëgjohet duke kërkuar nga bashkëbiseduesi i tij një shërbim në Gjykatën Administrative për zgjedhjet në Komunën e Dollnenit. Në materialin tjetër dëgjohen se si Mijallkov dhe Menduh Thaçi merren vesh që PDSH-ja të mbështesë VMRO-DPMNE-në e Gruevskit në Komisionin Shtetëror të Zgjedhjeve, për të anuluar një qendër votimi në Komunën e Strumicës që drejtohet nga Zoran Zaev i LSDM-së. Por, kreu i PDSH-së opozitare, Menduh Thaçi, tha se kjo bisedë e publikuar është e montuar. Nga ana tjetër, BDI-ja e Ali Ahmetit nuk e ka komentuar përmbajtjen e bisedës mes funksionarit të kësaj partie, Musa Xhaferi, dhe shefit të policisë sekrete, Sasho Mijallkov.