Ministrat e Brendshëm të Francës e Gjermanisë vizitojnë nesër Shqipërinë

Ministri i Brendshëm i Francës, Bernard Cazeneuve dhe Ministri i Brendshëm i Republikës Federale të Gjermanisë, Thomas de Mazière, do të vizitojnë nesër Shqipërinë, me ftesë të Ministrit të Punëve të Brendshme, Saimir Tahiri.

Programi i vizitës së dy ministrave të Brendshëm të Francës dhe Gjermanisë parashikon takime zyrtare në nivel delegacionesh në Ministrinë e Brendshme, të pasuara nga një konferencë shtypi në orën 15:00. Më pas ministrat e Brendshëm do të kenë një takim me Kryeministrin Edi Rama.

Në fund të vizitës së tyre në Shqipëri, dy ministrat e Brendshëm do të zhvillojnë një vizitë në Komisariatin e Policisë së Rinasit, të shoqëruar nga zv/Ministrja e Punëve të Brendshme, Elona Gjebrea.

Programi i takimeve:

Ora: 14:00 – 15:00 Takimi zyrtar i tre delegacioneve në Ministrinë e Punëve të Brendshme.
(Pamjet e takimit do të shpërndahen nga zyra e shtypit në MPB)

Ora: 15:00 – 15:30 Konferencë për shtyp në mjediset e Ministrisë
(Transmetim i lirë për të gjitha mediat e interesuara)

Ora: 16:00 – 17:00 Takim i ministrave me Kryeministrin Edi Rama.