Ministrat e Jashtëm pakistanez, saudit, turk dhe egjiptian takim për Lindjen e Mesme

Ministrat e Jashtëm të Pakistanit, Arabisë Saudite, Egjiptit dhe Turqisë do të takohen të dielën dhe të hënën në Islamabad për të diskutuar luftën në Lindjen e Mesme, njoftoi sot qeveria pakistaneze.

”Ministrat e Jashtëm të këtyre vendeve do të takohen në Islamabad më 29 dhe 30 mars për të zhvilluar diskutime të thella mbi një sërë temash, duke përfshirë përpjekjet për të ulur tensionet në rajon”, tha Ministria e Jashtme pakistaneze në një deklaratë.

Ata janë planifikuar gjithashtu të takohen me kryeministrin pakistanez, Shehbaz Sharif.

Ai zhvilloi sot një takim njëorësh me presidentin iranian, Masud Pezeshkian si pjesë e përgatitjeve për këtë takim, tha një burim qeveritar pakistanez.

Ata kishin qenë tashmë në kontakt në javët e fundit në lidhje me konfliktin dhe rolin e Pakistanit në ndërmjetësimin për t’i dhënë fund atij.

Ministri i Jashtëm turk, Hakan Fidan, kishte përmendur mundësinë e një takimi të tillë të katër ministrave të Jashtëm që të premten.

“Fillimisht, kishim planifikuar ta mbanim këtë takim në Turqi (…) midis Turqisë, Pakistanit, Egjiptit dhe Arabisë Saudite. Megjithatë, meqenëse homologëve tanë pakistanezë u kërkohet të qëndrojnë në vendin e tyre, e zhvendosëm takimin në Pakistan. Është e mundur që të takohemi atje këtë fundjavë”, deklaroi ai në kanalin televiziv privat turk ”A Haber”.

Duke ruajtur lidhjet si me Iranin ashtu edhe me Shtetet e Bashkuara, si dhe kontakte të shumta me shtetet e Gjirit, Pakistani është shfaqur ditët e fundit si një lehtësues i mundshëm i negociatave midis dy palëve në luftën e Lindjes së Mesme që filloi një muaj më parë.

Ndërsa Teherani refuzon të pranojë bisedimet me Shtetet e Bashkuara, iranianët kanë paraqitur zyrtarisht, përmes ndërmjetësit pakistanez, një përgjigje ndaj një plani amerikan me 15 pika, sipas një burimi anonim të cituar të enjten nga agjencia iraniane e lajmeve, Tasnim.

I dërguari amerikan, Steve Witkoff, deklaroi se shpresonte që takimet midis Iranit dhe Uashingtonit do të zhvilloheshin javën e ardhshme për t’i dhënë fund luftës në Lindjen e Mesme./  a.jor.