Mogherini: BE, e gatshme të ecë përpara me liberalizimin e vizave për Kosovën

Kryeministri i Republikës së Kosovës, Isa Mustafa, është takuar sot në Bruksel me Përfaqësuesen e Lartë të BE-së për Punë të Jashtme dhe Politika të Sigurisë dhe zëvendëspresidente e Komisionit Evropian, Federica Mogherini.

Në një komunikatë për media të zyrës për media të kryeministrit thuhet se Mustafa e ka njoftuar për progresin e gjithanshëm në Kosovë.

Kryeministri Mustafa u ndal po ashtu edhe te përmbushja nga ana e Kosovës të rekomandimeve dhe kritereve për liberalizimin e vizave, duke shprehur besimin se BE së shpejti do të marr vendim pozitiv për liberalizimin e vizave për qytetarët e Kosovës.

Përfaqësuesja e Lartë, Mogherini tha se shpreson që dialogu gjithëpërfshirës politik do të ndihmoj në tejkalimin e ngërçit në Kuvendin e Kosovës në periudhën e ardhshme.

Në komunikatë thuhet se kryeministri Mustafa dhe Mogherini vlerësuan progresin e vitit të kaluar në marrëdhëniet mes Bashkimit Evropian dhe Kosovës, duke pasur parasysh që Marrëveshja për Stabilizim- Asociiim do të hyj në fuqi nga 1 prilli.

Mogherini theksoi rëndësinë e kësaj marrëdhënie të parë kontraktuale në mes të BE-së dhe Kosovës, dhe ripërsëriti përkushtimin e saj për të punuar me kryeministrin Mustafa dhe autoritetet në Kosovë për të promovuar progresin e mëtejshëm në axhendën BE-Kosovë.

Ajo konfirmoi gatishmërinë e BE-së për të ecur përpara me liberalizimin e vizave për Kosovën, pas përmbushjes së kushteve.