Mogherini: Serbia të ecë në rrugën e reformave

Ministrja e Jashtme italiane, Federica Mogherini, e cila gjendet sot për një vizitë zyrtare në Beograd, deklaroi se ishte e kënaqur nga përparimet e bëra nga qeveria serbe, pavarësisht goditjen e rëndë që mori vendi ballkanik nga përmbytjet e jashtëzakonshme. Në një intervistë për gazetën e përditshme seerbe ”Politika”, nënvizon edhe përkushtimin e Italisë, si kryesuesja e radhës e Bashkimit Evropian, në favor të integrimit evropian të Ballkanit Perëndimor. “Mesazhi që sjell në Beograd është një nxitje e fortë për Serbinë për të vazhduar në rrugën e reformave. Serbia ndan me Evropën të njëjtat prioritete, rritjen ekonomike dhe punësimin”, deklaroi Mogherini, e cila përfundon sot turin e vizitave në Bosnje-Hercegovinë, Kosovë, Maqedoni dhe Shqipëri. “Një nga prioritetet e presidencës italiane është integrimi evropian i Ballkanit Perëndimor për të plotësuar projektin fillestar të themeluesve të Evropës së bashkuar dhe pikërisht për këtë presidenca italiane, që në javët e para, planifikoi misionin e saj në Ballkan, me vizitat në kryeqytetet që janë më përpara në procesin e integrimit”, theksoi Mogherini, e cila ka parashikuar takime me homologuin serb, Ivica Daçiç, kryeministrin Aleksandar Vuçiç dhe presidentin Tomislav Nikoliç.