Mosrealizimi i të ardhurave, Pezullohen nga detyra kryetarët e Doganës në Sarandë, Fier, Vlorë

Nis furtuna në Drejtorinë e Përgjithshme të Doganave vetëm pak ditë pas paralajëmrimit të kryeministrit Edi Rama.

15 drejtues të lartë të Drejtorisë së Përgjithshme të Doganave dhe 3 kryetar degësh janë pezulluar nga detyra për shkak të performancës së dobët në ushtrimin e detyrës.

Burime të Ora Neës pranë Drejtorisë së Doganave bëjnë me dije se 15 Drejtorë të Drejtorive të Zyrës së Përgjithshme janë pezulluar, ndërsa e njëjta masë është marrë edhe për kryetarët e Drejtorisë së doganës Fier, Sarandë dhe Vlorë.

Burimet thonë se në vend të tyre janë komanduar drejtues të rinj të cilët do të qëndrojnë në këto poste në pritje të vendimit të Komisionit Disiplinor.

Pezullimet janë bërë pas analizës së realizuar në këtë institucion pak ditë më parë dhe pas vizitës së papritur të kryeministrit Edi Rama, i cili paralajmëroi se cilido drejtues që ka përformancë të ulët do të lërë karrigen.

Pezullimet e 18 drejtuesve të lartë po ashtu vinë vetëm pak orë pas publikimit të treguesve fiskalë për 10 mujorin që lamë pas, ku regjistrohet thellim i mosrealizimit të të ardhurave nga Drejtoria e Doganave.

Doganat kanë krijuar kështu gropën më të madhe në buxhet dhe zërat kryesor me ndikim janë akciza, renta minerare dhe TVSH në import.