Moti i keq ndërpret qarkullimin e trenave
Dhjetëra vendbanime në Rumani mbetën pa energji elektrike, trenat janë ndalur, ndërsa rrugët nacionale janë mbyllur për shkak të motit të keq që përfshiu vendin.
Meteorologët lëshuan paralajmërim për “alarm portokalli” në qarqet Buziu, Vrança, Tullça, Jalomica, Galac, Vaslui, Bakau dhe Prahova, në pjesën juglindore të vendit.
”Një pjesë e rrugës Bukuresht-Konstanca dhe 23 rrugë të tjera në 11 qarqe janë mbyllur për shkak të reshjeve të rrëmbyeshme dhe stuhisë, ndërsa në qarqet Buziu, Braila dhe Vrança lëvizja është ndërprerë në tërësi nëpër të gjitha rrugët nacionale”, tha policia rumune.
”Pjesa më e madhe e trenave, të cilët qarkullojnë në pjesën jugore dhe lindore të vendit, janë hequr nga qarkullimi”, deklaroi kompania hekurudhore nacionale rumune, ÇFR.
Ndërkohë, gazeta “Rumania libera” njoftoi se në qarkun Galac qindra udhëtarë kanë mbetur të ngujuar në trena, që për shkak të dëborës të thellë janë detyruar të ndalojnë.
Një tren është dërguar nga Bukureshti për të marrë pasagjerët, të cilët në qarkun Braila mbi pesë orë kanë mbetur të bllokuar në dëborë.
”Dhjetëra vendbanime kanë mbetur pa energji elektrike, ndërsa shumica e pemëve kanë rënë në rrugë dhe mbi automjete”, nënvizon gazeta.
