Ndërtimi TEC-it në Maliq- Zhvillim projekteve për rritjen e prodhimit të energjisë elektrike
Komisioni për Veprimtarinë Prodhuese, Tregtinë dhe Mjedisin, diskutoi të martën projektligjin “Për miratimin e ndryshimit të statusit të një toke bujqësore, me sipërfaqe 288.4 ha, në zonë minerare, për shfrytëzimin e trofave për prodhimin e energjisë elektrike”.
Qëllimi i këtij projektligji është ndryshimi i statusit nga tokë bujqësore në zonë minerare të sipërfaqes prej 288.4 (dyqind e tetëdhjetë e tetë pikë katër) ha, për shfrytëzimin e torfave për prodhimin e energjisë elektrike, në zonën e ish-Kënetës së Maliqit.
Sipas relacionit që shoqëron këtë projektligj, bazuar në studimet gjeologjike dhe minerare, është përcaktuar se zona e ish-Kënetës së Maliqit përmban sasi të konsiderueshme torfash, materiale këto shumë të përshtatshme për djegie në impiante të prodhimit të energjisë elektrike.
Për shfrytëzimin e torfave në zonën e ish-Kënetës së Maliqit, në Ministrinë e Energjisë dhe Industrisë kanë ardhur disa kërkesa nga subjekte të ndryshme.
Qeveria është e interesuar për zhvillimin e projekteve për rritjen e prodhimit të energjisë elektrike, duke shfrytëzuar lloje të ndryshme të burimeve vendore të mineraleve energjetike me cilësi relativisht të ulëta, siç janë edhe torfat e Maliqit. Projekte të tilla janë me rëndësi strategjike për zhvillimin e mëtejshëm të sektorit të prodhimit të energjisë elektrike.
Një projekt i tillë për ndërtimin e një TEC-i në zonën e Maliqit është parë gjithmonë si një alternativë e mundshme.
