Në një shtëpi, 70 votues. Elez Gjoza: Sulm politik. Reagon ashpër LSI

Policia e Tiranës kallëzon në Prokurori administratorin e Njësisë Bashkiake numër 2, Elez Gjoza.

Sipas bluve të kryeqytetit, 58-vjeçari, nga viti 2013 e në vijim, ka regjistruar fiktivisht 70 persona me të njëjtin kod banimi me atë të banesës së tij.

Ky veprim, sipas policisë, është bërë me qëllim ndikimin në zgjedhjet e 25 qershorit.

Hetuesit dyshojnë se transferimi i të dhënave të gjendjes civile është bërë në këmbim të votës dhe premtimeve për vende pune. Por Gjoza thotë se dosja është mbyllur nga prokuroria ndaj, sipas tij, ky është një sulm politik.

“Kjo është për mua, në mënyrë absolute, me tendencë politike. Ky problem është ezauruar në 2013 nga Prokuroria. Në banesën time kanë ardhur të regjistruar me kontratë noteriale dhe të gjithë janë të larguar, jo 70 persona, mbase dhe më shumë. Të gjithë janë larguar nëpër shtëpitë e tyre me qira duke funksionuar sipas ligjit të gjendjes civile”, shprehet Elez Gjoza, administratori i Njësisë Bashkiake numër 2.

Gjoza reagoi sërish nga selia e Lëvizjes Socialiste për Integrim mbi akuzat e ngritura ndaj tij, ku edhe nënkryetari i LSI-së, Luan Rama lëshoi akuza të forta ndaj policisë, e cila sipas tij, po përdoret për të goditur rritjen e mbështetjes ndaj kësaj force politike.

“Edhe pse u hoqën 12 drejtorë, karteli i drogës vazhdon të përdorë drejtorin e Policisë. Ministri Demiraj të kryejë detyrën ose të dorëhiqet”, tha Luan Rama.