NYT: Piratë rus të informatikës vjedhin 1,2 miliardë fjalëkalime

Një grup piratësh rus të informatikës arritën të marrin rreth 1,2 miliardë fjalëkalime në internet nga kompanitë amerikane dhe të huaja nëpër botë, shkruan “New York Times”.

“Piratët arritën të marrin emrat e përdoruesve dhe fjalëkalimet e rreth 420 mijë faqeve të internetit, që shkojnë nga shitësit më të mëdhenj tek faqet më të vogla të internetit”, thekson “Times”.

E përditshmja i bazon këto informacione në kërkimet e kompanisë së sigurimit informatik “Hold Security”.

Madje piratët kanë arritur të kenë akses edhe në rreth 500 milionë llogari e-mail.

“Piratët nuk goditën vetëm kompanitë amerikane, ata kanë shënjestruar të gjitha faqet e internetit që mund të gjenin. Kjo lëviz nga kompanitë më të pasura të klasifikuara në 500 më të pasurat deri tek më të voglat”, deklaroi Alex Holden, themelues i ” Hold Security”, për “New York Times”.

Kjo ndërhyrje, që mund të jetë më e madhja e relaizuar ndonjëherë, ka filluar nga një grup piratësh me qendër në Rusi, diku mes Kazakistanit dhe Mongolisë.

Sipas “Times”, piratët, persona rreth moshës 20 vjeçare, nuk janë më shumë se 40 veta