PD: Mbrojtja e trafikantit, mafia ka kapur shtetin

Partia Demokratike ka denoncuar sot përfshirjen e deputetëve të mazhorancës në trafikun e drogës dhe imunitetin që jep qeveria për të kërkuarit nga policia

Ne nje deklarate per media, deputeti Arben Ristani ka thene “Policia e Shtetit, pas informacioneve që erdhën nga Italia dhe Mali i Zi, kreu para pak ditësh një operacion në zonën e Vilunit në Shkodër dhe arriti të ndalonte disa persona. E vërteta e dhimbshme është se Policia, nuk arriti të arrestonte kreun e organizatës”.

Sipas tij, kreu i organizatës, një person me precedent të rëndë penalë, i njohur për gjithë zonën për aktivitetin kriminal, u mor në mbrojtje nga një deputet i mazhorancës në Shkodër.

“Këtë fakt që e bëri të ditur ditën e aksionit të Policisë një e përditshme pranë qeverisë, e dinë tashmë edhe Prokurorët e krimeve të rënda, dhe drejtuesit e Policisë. Kreu i organizatës mafioze gjeti strehë në makinën e blinduar të deputetit të mazhorancës, makinë e cila përdoret edhe nga përfaqësues të tjerë, njerëzit më të besuar të Edi Ramës në zonën e Veriut. Ngjarja është shumë e rëndë. Deputetët e lidhur me krimin, dolën përsëri mbi ligjin”- tha ai.

Ristani ka thene se tërheqja e Policisë para këtyre fakteve, tregon se mafia ka kapur shtetin.

“Informacioni i ardhur nga vendet fqinje arriti të prishë rehatinë e deputetëve të Edi Ramës, u mori atyre një ngarkesë. Por kur trafiku lejohet nga qeveria, merret në mbrojtje prej saj, bashkëpunimi i autoriteteve italiane shkon dëm, pasi të paprekshmit e Edi Ramës nuk mund të ndalohen. Kjo është e vërteta e rendit dhe e krimit në Shqipëri”- tha ai.