Përfundon paqësisht protesta e opozitës, Basha: Vendosmëri për zgjedhje të lira e të ndershme

Me Himin Kombëtar, Partia Demokratike dhe aleatët e saj kanë përfunduar pa incidente protestën njëorëshe me bllokimin e trafikut në disa akse kryesore kombëtare në Tiranë dhe rrethe. Protesta nisi në orën 11:00, për të vijuar deri në orën 12:00, siç ishte lajmëruar nga organizatorët një ditë më parë.

Epiqendra e protestës ishte sheshi “Shqiponja”, ku bashkë me protestuesit dhe deputetët e opozitës, ishte edhe kryetari i Partisë Demokratike, Lulzim Basha.

Në mbyllje saj, kryetari Basha, ripërsëriti kërkesën për qeveri teknike. Përmes megafonit, kreu i PD-se tha se qeveria teknike do të garantojë luftën ndaj krimit, votimin dhe numërimin elektronik, si edhe votimin e zbatimin e Vettingut.

“Zoti i bekoftë shqiptarët për këtë qëndresë. Ky ishte një paralajmërim se vendosmëria e bashkimit qytetar është e pathyeshme për realizimin e zgjedhjeve të lira dhe të ndershme”, deklaroi Basha. Në përfundim të protestës, ai i bëri thirrje mbështetësve të opozitës që ta mbyllin protestën duke kënduar himnin kombëtar. Protesta e paralajmëruar e opozitës shkaktoi probleme dhe pengesa në qarkullimin rrugor.

Ajo u zhvillua në dy akse kryesore në Tiranë, Shkolla Teknologjike dhe Rrethrrotullimi Shqiponja. Ndërkohë protestë u zhvillua në Lushnje, Milot, Elbasan etj. Gjatë gjithë zhvillimit të saj për një orë, nuk pati asnjë incident mes protestuesve dhe policisë. Gjithashtu, protestuesit lejuan që ambulancat dhe rastet urgjente të qytetarëve të kalonin edhe pse rrugët ishin bllokuar.