Procesi, Gjykata e Lartë ngurron ndaj kërkesave të Tom Doshit
Gjykata e Lartë ka vendosur të mos shprehet me vendim përfundimtar në lidhje me disa kërkesa të deputetit Tom Doshi, që kanë të bëjnë me pretendimet e tij për disa prova që nuk janë pranuar të merren parasysh nga Prokuroria e Përgjithshme.
Mes kërkesave ishin ballafaqimi me ministrin e Brendshëm Saimir Tahiri, marrjen në pyetje të kryeprokurorit Adriatik Llalla, video nga kamerat e sigurisë të aeroportit të Hanoverit në Gjermani, ku sipas Doshit kryetari i komsionit të sigurisë kombëtare, Spartak Braho është takuar me Fatjon Skënderin, ndërmjetësin mes kryeparlamentarit Ilir Meta dhe Durim Bamit.
Por këto kërkesa të deputetit Doshi nuk morën përgjigje përfundimtare nga Gjykata e Lartë, e cila vendosi se ato duhet të shqyrtohen dhe vlerësohen nga trupa gjykuese që do të gjykojë në themel çështjen ndaj Tom Doshit për akuzën e kallëzimit të rremë.
