Programi bërthamor i Iranit, shtyhet afati për arritjen e marrëveshjes paraprake

Përfaqësuesit e Iranit dhe 6 fuqive botërore nuk arritën një marrëveshje brenda afatit të parashikuar që ishte 31 marsi mbi programin bërthamor të Teheranit, por në fund të ditës palët ranë dakord për të zgjatur bisedimet edhe për një ditë.
Arritja e një marrëveshje paraprake është mjaft e rëndësishme për t’i hapur rrugën një marrëveshje përfundimtare, afati i të cilës është deri në fund të qershorit. Nënshkrimi i kësaj marrëveshjeje do t’i jepte fund bllokimit 12-vjeçar të Iranit dhe do të ulte ndjeshëm rrezikun e një lufte në Lindjen e Mesme.
Shtetet e Bashkuara kërcënuan me braktisje të negociatave ditën e martë pas pohimit të përfaqësuesve të Iranit për të “drejta bërthamore”.

Zyrtarët amerikanë kanë bërë të ditur se një ndër çështjet kryesore të ngecjes së negociatave ishte heqja e sanksioneve të OKB-së dhe rivendosja e tyre në qoftë së Irani do të shkelë marrëveshjen.

“Negociatat do të përfundojnë kur të gjenden zgjidhjet”, tha kryenegociatori i Iranit, Hamid Baidinejad. “Ne nuk jemi duke shikuar orën” shtoi ai.