Rama: Antikorrupsioni në shëndetësi, sfidë kryesore e qeverisë

Kryeministri Edi Rama tha sot se vit i dytë i mandatit qeverisës të koalicionit të majtë “Aleanca për Shqipërinë Europiane”, do të karakterizohet nga një luftë e panjohur më parë kundër korrupsionit.

I pranishëm në analizën e punës 300 ditore të Ministrisë së Shëndetësisë, Rama deklaroi se “kjo do të jetë një luftë e shtrirë në të gjitha nivelet dhe në të gjitha planet”.

“Fushata antikorrupsion që do të nisë në vjeshtë do të ketë në zemrën e vet luftën kundër korrupsionit në shëndetësi, në spitale, në çdo sportel e derë ku njerëz në pikë të hallit, vijnë të marrin atë që i takon, kujdesin shëndetësor”, tha shefi i qeverisë.

Rama nënvizoi se “èshtë e patolerueshme që Shqipëria, në mes të Europës, një kandidate e BE-së, në të gjitha arteriet e shërbimit të saj shëndetësor të pluskojë llumi i korrupsionit. Dhe kjo nuk është një çështje njerëzish, por në radhë të parë një çështje përgjegjësie politike e publike që duhet ta ketë gjithsecili”, u shpreh kryeministri